DAY 66 沖繩一記

在日本第66日，是時候整理下自己完成緊件乜野既事。打從Day1就分不清這是發自剎時衝動或部署已久的一回事；衝動，我承認是看了walter mitty 才冒起出外走走的念頭;但同時,我又會處心積慮讀日文及砌好份申請表。然而，唯一可肯定是這事實在瘋狂，身邊好多人：就連我阿妹d fd都話我點解放棄一份穩定既工（註：非高薪）；原因？我也答不上，可能自己未玩夠，又可能犯賤想試下日本果種唔自chur唔安樂既工作環境。 沖繩是由大學grad. trip便想去的地方。然而，四月份來到沖繩，竟然有點不適應；其一，是要重新適應環境，重新建立人際網絡；其二，是所住的guesthouse不如京都般親切，眾人也是各自為政（也許是自己問題，不過就是沒有那種大伙子一起玩的感覺）其三，是心態上很難分開旅遊觀光與工作生活，這一點很關鍵，和旅行不同，你必需每天把生活費降至最低，尤其沒有工作的時候；加上沖繩消費尤其高（交通飲食真心貴）工資卻十分低（每小時680-700円）所以，種種落差令我對沖繩產生負面感覺。 不過，否極總會泰來。第一個achievement當然是膽粗粗去考潛水牌，月頭考左OWD, 月尾考埋AOW; 雖然每次潛完都攰到癲，但係同游水唔同，水㡳呼吸著觀看珊瑚群感覺堅係正。有時，藍海再大，也不及海底的深度之美。第二個unlocked achievement係小弟終於脫離貧窮族，響日本搵到第一份工，響老人院食堂做廚房，諗起自己用極爛既日文去hellowork搵工，再著住長䄂裇長西褲於烈日當空下行去見工，青春熱血既感覺全部返哂黎。熟悉我都知我願望是到日本餐館打工，所以自己覺得好好彩，而且更打破「做日本餐館你起碼洗幾年碗先俾你掂食物」既傳說；洗碗是有（而且仲要洗70人份量大飯煲等等）但同時也有食物處理：由洗米刨絲切菜，到撈沙律包飯團整餃子醃漬物，前幾日仲學埋起骨切魚；前輩們很好人，從他們身上學識勁多㕑房日文生字之外，更學左好多料理：炒苦瓜、檸檬雞炒飯、中華春雨，（我仲學左點整納豆整到唔臭易入口，依家日日食食到上癮)；最爽都係每日可以被米飯之神眷顧，除左包括午飯，派剩既飯餸仲可以帶走，真係可以慳唔少。四月尾轉左另外一間旅館，果度不論房客同staff都比之前nice同可以打成一片，屋頂仲有bar晚晚開party,說到㡳，住guesthouse就是要尋找呢種感覺。 過了兩個多月，得到很多，惟遺憾也有點。第一是我在沖繩因只顧打工放棄了練劍；第二是我要各位擔心了，我有可靠的家人及朋友，然而，這常常無形令自己變得依賴及缺乏自信，所以在沖繩這兒即使一開始不習慣也不願多説，希望靠自己解決。第三是我有次無食早餐返工，點知刨刨下青瓜眼前一黑暈左，瘀到爆，所以我要記得每日返工前要食飯。 總結一下，以下是我對沖繩/打工的感受： 1）每天也是party mode,返工可以著夏威夷T恤（男人甚至可以豪邁到唔拉褲鏈，恕我未做到） 2）無車等如跛，如果想去遠的觀光點，可以參加觀光巴士團，而且有好多景點都好細，好快行完（例如：萬座毛）／剩係買野（例如：名䕶菠蘿園），所以比較便宜之餘，又不用長途跋涉後中伏。 3）打工最困難的，是要限時分發牛肉丼，但牛肉和粉絲糾在一起，還要加上不多不少的肉汁，仲難過明火煮食。 最後一句：今日我終於響異地打工出左糧喇！